Бүгінде осындай саладағы жас мамандарды қолдау мақсатында бірқатар бағдарлама жүзеге асып келеді. Соның бірі – үш жылдан бері жоғары нәтижеге қол жеткізіп келе жатқан «Жарқын Бола­шақ» мыңдаған жасқа тегін білім алуға мүмкіндік берді. Бұл жоба техникалық бағыттағы мамандарды даярлауға айрықша көңіл бөледі. Әсіресе, жұмысшы кәсіптерге басымдық берілген. Бағдарлама аясында жастар Қазақстанның 11 өңіріндегі 60 колледжде тегін оқи алады. Гуманитарлық және педагогикалық бағыттармен қатар техникалық, IT салалары да қамтылған. Бүгінде студенттердің жартысына жуығы техникалық маман­дықтарды меңгеріп жүр. Кейіпкерлеріміздің әрқайсысы кәсіби маман ретінде дағдыланған. Қарағанды машина жасау колледжінде техник-технолог мамандығы бойынша білім алып жатқан Айбар Әжіғали қазір қаладағы ірі өндіріс орындарының бірінде тә­жіри­бе­ден өтуде. Айбардың ойынша, кәсіби-техникалық білімді ерте бастан игеру – жастардың өмірге тез бейімделуіне, нақты еңбекке еркін араласуына мүмкіндік береді. Өзінің де техникаға қызығушылығы бала кезден басталған.
«Әкем механик, бала кезімнен қасында жүріп, көптеген іске араластым: метал тазалап, сырлауды, тұрмыстық заттарды жөндеуді үйрендім. Колледжде оқи жүріп, сызбалармен жұмыс істеуді, техникалық құжаттармен танысуды үйрендік. Енді сол теорияны нақты өндірісте қалай іске асыратынымды көріп жатырмын» – дейді ол.

Ал Көкшетау қаласындағы Құрылыс-технологиялық колледжде оқып жүрген Фариза Елдаш аспаз-кондитер мамандығын меңгеріп жатыр. Үш жыл ішінде ол кондитерлік өнерге ерекше қызығушылық танытып, бүгінде қамыр илеу мен нан өнімдерін пісіруге машықтанған. Болашақта шағын кофейня ашып, тәтті тоқаштар, круассан сияқты өнімдерді ұсынуды армандайды.
 Сондай-ақ Астана қаласындағы Құрылыс-техникалық колледжінің білім алушысы Бекжан Өтелген автокөлікке техникалық қызмет көрсету және жөндеу мамандығын игеріп жүрген жас маман. Бекжан техникалық білім мен кәсіпкерлік көзқарасты ұштастыра отырып, болашақта көлікті жөндеу және жаңарту бойынша қызмет көрсететін орталық ашсам дейді. Оның пайымдауынша, «Жарқын Болашақ» бағдарламасы жастарға тек қаржылай емес, менторлық, әлеуметтік, психологиялық қолдау да көрсетеді.
«Жарқын Болашақ» бағдарламасы аясында 12-22 жас аралы­ғын­дағы маңғыстаулық жастар тегін білім ала алады. Жоба «Қаз­МұнайГаз» ұлттық компаниясы мен Samruk Kazyna Trust қорының қолдауымен және Bilim Foundation корпоративтік қорының ұйымдастыруымен жүзеге асып келеді. Бағдарлама өзге өңірге келген студенттерге жаңа ортаға бейімделіп, жеке жауапкершілік алуға, кәсіби мақсат қоюға көмектеседі.

Материал AIQYN басылымында жарық көрді